ទុក្ខស្រី ប្តីកាន់លុយប្តី ប្រចណ្ឌខ្លាំងក្តោបក្តាប់សេដ្ឋកិច្ចក្នុងគ្រួសារប្រពន្ធសម្រេចស្លាប់ដោយចង.ក
06-June-2016 | ដោយ មែន កំសត់
ខេត្តក្រចេះ ៖ ស្ត្រីម្នាក់ត្រូវកម្លាំងនគរបាលស្រុកព្រែកប្រសព្វកំណត់ថា បានស្លាប់ដោយសារការធ្វើអត្តឃាតសម្លាប់ខ្លួនឯង ហើយក៏ត្រូវអ្នកភូមិសន្និដ្ឋានទៀតថា មូលហេតុដោយសារតែនាងពិបាក និងរស់នៅជាមួយបុរសជាប្តី ដែលពោរពេញទៅដោយភ្លើងប្រចណ្ឌខ្លាំង និងតូចចិត្តព្រោះតែប្តី ជាអ្នកក្តោបក្តាប់សេដ្ឋកិច្ចក្នុងគ្រួសារគ្រប់បែបយ៉ាងទាំងអស់ ។
នគរបាលស្រុកព្រែកប្រសព្វឱ្យដឹងថា ស្ត្រីរងគ្រោះឈ្មោះនួន សុដាវី អាយុ២៦ឆ្នាំ ត្រូវសាច់ញាតិប្រទះឃើញស្លាប់ដោយយកក្រម៉ាចង.កនៅបន្ទប់ទឹក ក្នុងផ្ទះ ស្ថិតក្នុងឃុំព្រែកប្រសព្វ ស្រុកព្រែកប្រសព្វ កាលពីយប់ថ្ងៃទី៣ មិថុនា ។
បើតាមការបញ្ជាក់ពីបុរសជាប្តីឈ្មោះបេ ទ្រី អាយុ៥២ឆ្នាំ ឱ្យដឹងថា ក្រោយពីមានជម្លោះពាក្យសម្តីក្នុងគ្រួសារ ប្រពន្ធគាត់បានប្រមូលខោអាវទៅបោកគក់ក្នុងបន្ទប់ទឹក និងចាក់គន្លឹះទ្វារជាប់ ។ រយៈពេលមួយម៉ោង គាត់ដើរទៅងូតទឹក ស្រាប់តែប្រទះឃើញប្រពន្ធស្លាប់ដោយចង.កបាត់ទៅហើយ ។
ជុំវិញការសម្រេចចិត្តធ្វើអត្តឃាតរបស់ស្ត្រីរងគ្រោះ ត្រូវអ្នកភូមិលើកឡើងថា ដោយសារតែនាងពិបាករស់នៅជាមួយប្តី ដែលតែងតែប្រចណ្ឌ រករឿងនាង ព្រោះប្រពន្ធមានវ័យក្មេងជាង។ កន្លងមក ក៏ធ្លាប់មានរឿងឈ្លោះប្រកែកគ្នាខ្លាំងដែរ ធ្វើឱ្យស្ត្រីជាប្រពន្ធសម្រេចចិត្តវេចបង្វិចទៅរស់នៅជាមួយ ឪពុកម្តាយអស់មួយរយៈ ដោយសារតែទ្រាំមិនបាន ពីការរករឿងពីប្តីខ្លាំងពេក ។
ប្រភពបន្តថា មិនត្រឹមតែផ្ទុះភ្លើងប្រចណ្ឌខ្លាំងនោះទេ ស្ត្រីរងគ្រោះតែងតែនិយាយប្រាប់គេឯងថា «នាងខ្មាស់គេ ដោយសារគ្មានលុយនៅជាប់ខ្លួន ព្រោះតែសេដ្ឋកិច្ចក្នុងគ្រួសារ ត្រូវប្តីនាងជាអ្នកក្តោបក្តាប់ សូម្បីតែទៅទិញម្ហួបនៅផ្សារ» ។ ដូចទៅនឹងអ្វីដែលបានបង្ហើបប្រាប់នេះ ទើបអ្នកភូមិសន្និដ្ឋានថា ការសម្លាប់ខ្លួនរបស់ស្ត្រីរងគ្រោះចោលកូន២នាក់ ដោយសាតែនាងពិបាករស់នៅជាមួយប្តីនោះឯង ។
ចំនួនអ្នកទស្សនា
- ថ្ងៃនេះ2721
- ម្សិលមិញ14181
- សប្តាហ៍នេះ2721
- ខែនេះ117871
- ឆ្នាំនេះ117871
- សរុប20560327